Ndërsa ministrat e G20 dhe guvernatorët e bankave qendrore do të mblidhen në Bali këtë javë, ata po përballen me një perspektivë ekonomike globale që është “përkeqësuar ndjeshëm”, ka thënë shefja e Fondit Monetar Ndërkombëtar, shkruan The Guardian.

Kristalina Georgieva la të kuptohet se FMN-ja do të ulë pritshmëritë e saj për rritjen ekonomike globale këtë muaj, duke thënë se perspektiva mbetet “jashtëzakonisht e pasigurt” dhe duke fajësuar luftën në Ukrainë, inflacionin më të lartë se sa pritej dhe pandeminë e vazhdueshme Covid.

“2022 do të jetë një vit i vështirë dhe ndoshta një 2023 edhe më i ashpër, me rrezik të shtuar të recesionit.

Lufta ka ndikuar në ekonominë e vendeve veçanërisht nëpërmjet rritjes së çmimeve të mallrave që po ngadalësojnë rritjen dhe po përkeqësojnë një krizë të kostos së jetesës që prek qindra miliona njerëz-dhe veçanërisht njerëzit e varfër që nuk mund të përballojnë të ushqejnë familjet e tyre”.

Ministrat e financave të G20 dhe guvernatorët e bankave qendrore po përgatiten të takohen në Bali ku do të diskutojnë mbi ekonominë globale, duke përfshirë sigurinë ushqimore dhe ndikimin e luftës në Ukrainë.

Georgieva bëri thirrje për “veprime vendimtare dhe bashkëpunime ndërkombëtare, të udhëhequr nga G20”. Guvernatori i bankës qendrore të Indonezisë Perry Ëarjiyo është i kujdesshëm në lidhje me perspektivën e arritjes së një marrëveshjeje, duke thënë: “Ne shpresojmë për më të mirën, por sigurisht po përgatitemi për më të keqen”.

Georgieva tha se inflacioni është “zgjeruar përtej çmimeve të ushqimit dhe energjisë” në atë që ka bërë që shumë banka qendrore të rrisin koston e huamarrjes, diçka që ajo tha se “do të duhet të vazhdojë”./arbresh.info/